زيارة معالي الوزير

من حوالي 3 أسابيع وااشركة مقرقعة راسنا عشان بدو يزورنا معالي وزير الإتصالات، ألبسوا بدلة، أحلقوا اللحية ما حد يطلع برا الشركة الكل يلتزم على مكتبو ويعمل حالو بشتغل ( ممنوع تشتغل بس أعمل حالك بتشتغل) يعني بالعربي بدنا نعمل فيها شركة مثالية الكل مرتب ونظيف وملتزم بمكتبوا وما شاء الله تقول فرع المدينة الفاضلة في الأردن، ما خطر على بال الشباب أنو في وزارة الوزير نصهم متهرب من الدوام والنص الثاني بقرء الجريدة

المهم يا جماعة الخير ولا تهون يا معالي الوزير، من 3 أيام وعمليات التنظيف والتنسيق على قدم وساق، أفرك سجاد وأمسح زجاج ولمع حيطان أجلي الجلي وأكوي الكوي، قرفونا بريحة المنظفات فكرهم لو ما خففوا بالمي ما بنظف، وكلو عشان معالي الوزير جاي، الله يكثر زياراتك يا وزير، نظفتلنا الشركة

البارحة كنت عند زبون طول اليوم ما دخلت الشركة للساعة خمسة وربع، لقيت الشركة قايمة قاعدة وزي النحل الكل رايح جاي، لقيتهم جايبين 20 لوحة تحفيزية، بتعرفوها هاي قصص العمل الجماعي والصدق في العمل ورضاكي يا أمي وعشقك السفر من غدر البشر، اللهم بالأنجليزي، وعلقوها بكل محل بالشركة، الله يكثر زياراتك يا وزير، حفزتلنا الشركة

أكثر شيء مميز الصراحة كانت صور الملك يلي جابوها وعلقوها بكل الشركة، في صور الكبيرة ورا راسي حاليا ما شاء الله عشان يعرف معالي الوزير أنو أحنا جماعة عندنا نماء وأنتماء وشفافية وحب للوطن والملك ونعبر عن حبنا بجميع الوسائل وبدون أي نفاق أجتماعي أو سياسي البتة، موضوع تعليق الصور الصراحة صدفة لا أكثر أجت مع جيتك معالي الوزير، الله يكثر زياراتك يا وزير، علمتلنا الشركة الأنتماء

لفت علينا السكيرتيرة تنبهنا ما حد يعلي صوتو والكل يحكي بصوت واطي والكل يرتب مكتبو ويتأكد أنو نظيف عشان معالي الوزير بدو يمر علينا يسلم على الشباب، أنا قلت لحالي إذا فاضي بنفت لعبة تركس بلبسوا شيخ الكبة وبصير الشب يلي لبس الوزير شيخ الكبة، بس المدير رفض الفكرة، بس بدكم الحق أنا عمري ما شفت المكاتب مرتبة هيك قبل، الله يكثر زياراتك يا وزير، هذبتلنا الشركة

من ضمن الأمور الجميلة ركبوا شاشة العرض يلي بحكوا عنها من ستة أشهر، صلحوا الأضوية التافة كلها وعدلوا بعض الأمور الأخرى و تطويرات جميلة، في كثير أمور عالقة من أشهر خلصنها بمصادفة زيارة الوزير وأنا مُصر أنها بس مصادفة لا أكثر، الله يكثر زياراتك يا وزير، طورتلنا الشركة

والله يا معالي الوزير مش عارف شو أحكيلك، زيارتك الغالية خلتني أفكر كم نحن منافقين وشغل حكي فاضي ومظاهر، ما حد طلب منا أنجهز مشروع أو نقترح أفكار مميزة لمعالي الوزير، بس نظافة مؤقتة، وترتيب لحظي ونفاق أجتماعي، الله يكثر زياراتك يا وزير، كشفتلنا الشركة

أخيرا لا يسعني إلا أن أشكر الوزير على الزيارة الميمونة وأتمنى أن يشرفا هو وباقي الوزراء بشكل مستمر

بهاي المناسبة بحكي

حنا للظيف حنا
حنا للسيف حنا
حنا فراشات زغار